倫敦唐人街的收獲

每次去倫敦都必去唐人街飲茶同去超巿入貨, 早幾日去倫敦搵樓, 當時唔會放過呢個機會.

上次試左X鳴村既點心, 唔錯, 不過我唔鍾意佢地無點心記錄卡,叫左幾多個點心要自己記住, 埋單又求其搵張紙寫低總價, 無細數俾你睇.

今次試左另一間 - X章居, 原來係推點心車仔, 唔洗用點心紙, 我地一坐地, 茶都未開, 已經有人推車仔埋黎問我地要什麼點心, 一架黎完又另一架, 可能當時已經兩點幾, 得三兩枱客, 所以佢地行動咁"迅速".

餐牌上的點心無註明價錢, 無註明大中小點, 全部都係"無價之寶"

又因為點心一早已預備好係點心車上而唔係即蒸, 蝦餃皮都"林"晒.

應該都無下次.

點心過後另一節目就係去超巿入貨, 之前很想食皮蛋同油炸鬼, 因為我好鍾意食粥. 上星期去紐卡素買皮蛋點知假期休息, 今次無論如何要係倫敦入貨.

買到心頭好 - 皮蛋6隻, 4.2英鎊, 一買就6隻, 不過可以擺成半年, 一個月食一隻都無左, 而且我另一半又唔鍾意皮蛋, 我可以一個人食晒.

仲有買左兩條油炸鬼, 上次係唐人街買過, 成1英鎊一條. 今次諗住去第二間舖頭睇下會唔會平D. 點知仲貴, 要1.5..... 真係離譜左少少.